Delio Tessa – Sui Scal

Ei! ma sì! per fatt piasè
disaroo ona bosinada
ancamò; chè tant, asnada
pu, asnada men, quand gh’è
la salut… già… no se falla,
vera? bravo!… sicchè donca…
– trii conchin fan ona conca –
gh’óo de dilla o de cuntalla?
Giust in vuna de sti sir
per andà a pagà la tassa
del Quartett che me salassa
el borsin – vottanta lir…
Dio te mazza! – propri lì
sul zerbin dell’uss che gh’à
scritt sul veder – Società
del Quartetto – troeuvi lì
sui duu pee dò tosanett
ch’eren drée a cuntalla sù.
«Ei… chi l’è ch’el cerca… èi lù
in doe el va?» «Voo chì al Quartett
per servilla… me rincress
de dovella disturbà…
me despias… ma gh’óo de andà
giust chì denter… conpermess!…»
«L’è saraa… gh’hinn nò… gh’hinn minga!»
«Oej che sprella!… t’è andaa a mal
i bigatt?… infili i scal
pesg che in pressa!… se gh’hinn minga
fa besogn de mangiamm viv?!
Oeu la peppa… che accident
d’ona portinara! Sent…
anca lor sti lavativ…
però… sent… la ghe voeur tutta
de famm cor inanz… indree
per andà a portagh danee…
tira e molla e no se butta
a trovaij!» e ghe casciavi
duu saracch al segretari!…
e sentivi su per ari
i vosett – intant che andavi
giò di scal pianin, pianin –
de qui dò donnett de l’aj
che parlaven di regaj
che gh’aveva faa el bambin:
«On guantin el m’à portaa…
noeuv… e per la Luisina
l’à portaa ona palatina…»
«Robb de pagn el v’à portaa…
l’è on bambin quell lì?» «E inscì?
semper robba de belee?!»
Ma on garzon de prestinee
ch’era sotta a descutì
su on repian, cont ona donna
de servizi, el m’à inibii
de capì ‘l rest… óo sentii
quest domà «De scons!» «Madonna,
on guantin!» che lì l’inscì
sbragalaven intrattanta:
«Trenta duu e vott… quaranta
a cà mia!» «E quisti chì
hin per mi? dove j’e mett?»
«Hin quaranta gheij, óo ditt;
fa ‘l tò cunt… trii cavoritt,
dodes gheij; poeu cinqu michett,
trenta duu; poeu on volta sù,
fann quaranta! … te ghe rivet?»
Se taseven, te sentivet
ancamò qui dò là sù:
«On guantin!…» dò parolett
e bott lì… che quist tornaven
a fass sott… se saccagnaven
in sul numer di michett!

Lascia un commento