Haimandl
Aus Wikipedia
![]() |
Der Àrtikl is im Dialekt „Owaöstareichisch“ gschriem worn. | ![]() |
Haimandl sågt ma in Baian, Ésdaraich und Siddiaroi zu Konsdrukzionen, dé ma am Fød zan Hai drikan aufschdöd. Nåchn mân wiad s Hai oda s Grõamad mid da Haigåwi auf a hüzans Gschdö aufgschlicht und zan drikan in da Son am Fød schdê låssn. Es gibt Haimandl-Gschdö mid 3 oda 4 Gweaschdeka, éfda siagt ma åwa piaramidnfeamige Haimandl wo s Gschdö aus drai aufrechde Schdeka bschded, fåst wia a Indiana-Tipi. S faichde frisch gmade Grås wiad auf dés Gschdö draufglégt oda aufi gschlicht und soid so s Hai schnøla drikan. Fia d Bauan is nemli wichdi, dass Hai oda s Grõamad druka wiad, wai s eana sunst dafaid und oisa faichde kã ma s a ned in Haischdå'l âilågan.
Haimandl san oft recht kunstfoi aufgschlicht und schaun guad aus. Se håidn s Grås a dãn druka, wãns amåi lenga réngt und fria hãm mãnche klõan Bauan, dé goa kõan Schdådl gåbt hãm, s Hai sogoa auf dé Oat bis in Winta aini glågat.
Mandl hoassn s déswéng wai de Haihaufn "mãnshoch" san und fu da Waidn wia Mandl ausschaun und ma glaum kintad, då schded wea am Fød.
Haid siagt ma Haimandl neta nu sødn, wai s Haimåcha maisdns maschinel min Drakdoa gmad wiad. Oft wiad s Hai nåchn drikan mid da Bünkimåcha zu Hai-Båin brest oda s Grås wiad glai so wia s is âisiliad. In Lenda, wo d Lãndwiatschåft nu dradizionela årend, siagt ma åwa a haid nu fü Haimandl in da Gégend schdê, bsondas natiali im Heabst.
Nåchdém s bai ins fåst kõane Haimandl mea gibt, san s in am Oat Retro-Trend wida modean woan und mãnche Laid hãm "Deco-Haimandl" im Goatn schdê, neta wai s guad ausschaud. Soichane Dekoarazions-Haimandl gibt s dailwais sogoa oisa featige zan kaufn. De åidn Haimandl-Gschdö wean a mãnchmåi ois Dekoarazion fia an Bauangoatn fawent und Goatnutensilien wiar an Ãmpa oda a Goatnschlauch wean drauf ghengt, oda ma låst Blêampi aufi wågsn.
In Slowenien hoast ma d Haimandl, bzw. s Haimandl-Gschdö a Kozolec. Fu dém kimd a s Keantna Woat "Köse" fia s Haimandl-Gschdö, wo ma sunst im Dialekt a "Harpfn" dazua sågt.