Tameddaqut
Seg Wikipedia
Deg wussan-agi iɛeddan, ruḥeɣ ɣer tmurt n Yicawiyen, s idurar n Wewras, u ssawḍeɣ ad d-leqḍeɣ sɣur kra n waytmaten aṭas n wawalen imaziɣen deg tutlayt-nneɣ tamerkantit.
Deg tama n Wewras, llan waṭas n yimukan umi qqaren "Tameddaqut". Yuɣ lḥal, awal-a mazal yesɛa anamek (lmeɛna) deg tcawit. "Ameddaqu" anamek-is d amkan "iɣenjen", iṣubben d takessart, ad as-tiniḍ d aḥwiḍ (bassin, dépression dans le relief), yernu ameddakel ay d aɣ-d-yennan ay-a, yenna-yaɣ-d dakk-n akk imukan umi qqaren "tameddaqut" d imukan "iɣenjen", ṣubben d takessart, am yeḥwiḍen.
Deg tmurt n Yicawiyen llan kra n medden ara yettgen anadi ɣef yismawen n yimukan yernu ay-a d ay-n igerrzen. D acu kan, bɣiɣ ad d-greɣ tamawt dakk-n abrid ay yes ttafken ismawen n yimukan deg Tmurt n Leqbayel d Merruk yemgerrad ɣef win n tama n Yicawiyen. Deg Tmurt n Leqbayel akk d tmiwa n yidurar n Lexḍareyya d Waṭlas ablidi, medden llan ttafken ismawen n yimukan ɣef leḥsab n wamek iga wakal. Yuɣ lḥal, Leqbayel n zik llan gellmen-d (weṣṣfen-d) amek tga tmurt ay deg zeddɣen i wakk-n ad asen-tifsus tudert deg-s. Imi nitni d ifellaḥen yernu d imerkaden (sédentaires), llan sɛan assaɣ (lien) meqqren akk d wakal, u ḥwaǧen ad d-weṣfen amek iga wakal-nsen i wakk-n ad asen-tifsus tudert deg-s. ɣef way-a ara d-naf aṭas n yismawen n yimukan deg tmiwa-yagi gellment-d akal n tmurt s timmad-is : Tagemmunt, Agemmun, Tawrirt, Iɣil, Asif, Adrar, Tizi, Agni, atg. Abrid-agi n usemmi n yimukan nezmer ad t-naf ula ɣer Yimuhaɣ akk d kra n Yimaziɣen n Merruk.
D acu kan, deg tama n Yicawiyen, yewwi-yi-d Rebbi dakk-n ismawen n yimukan ay d-igellmen (weṣṣfen-d) amek iga wakal ur ṭṭuqqten ara am deg Tmurt n Leqbayel. Deg Wewras akk d ccerq n Ldzayer, ismawen n yimukan ay yeṭṭuqqten d ismawen n leɛrac d twaculin ay izedɣen deg tama-yag, u γef way-a ara naf aṭas n yismawen ay d-ibeddun s "Ayt" (s tcawit) neɣ s "Bni" ("Béni") s taɛrabt.
[beddel] Tamselyut
- Omar Amastan Mouffok, imedyazen.