Azad Zal

Ji Wîkîpediya

Azad Zal nivîskar û rojnamevanê Kurd e. Zal di adara 1972yan de li Gundê Çawuşelîkeya (Çawişelikya / Çavşeliqya; navê kevin Gulemîran) ku bi Navçeya Navend ya Amedê ve girêdayî ye hatiye dinyayê. Wî li ber destê bavê xwe perwerdehiya sereke ya bi Kurdî û Erebî dîtiye. Şûn de li gund dibistana sereta ya tirkî xwendiye. (1979-84) Sala pêşî ji ber ku mamosteyê wî Kurd bûye û mirovekî baş bûye, zêde bandora çanda tirkî li ser wî çê nebûye. Ji ber ku nasnameya wî tune bûye li gund 5 salên dibistana seretayî bê nasname xwendiye. Lê ji bo ku ew dibistanê berdewam bike diviya li bajêr bixwendana. Ji bo wê jî nasname pêwist bû. Piştî dibisatana sereta 3 salên wî diqedin hê nasnameya tê derxistin. Navê wî jî diguhere dibe Mehmet. Dibistana navîn û lîseyê li Amedê dixwîne. Bi kutakirina lîseyê re di Berfanbara 1992yan de ji ber sedemên polîtîk tê girtin. Li ser pirsgirêkên siyasî lê doz tê vekirin û tê darizandin. Di encama darizandinê de 22 sal û 6 meh ceza lê tê birîn. Li zinadana Amedê, li ya Dîlokê (Entab), li ya Gîresûnê, û li zindana tîpa Feyê ya Sîncana Enqereyê bi tevahî 12 salan girtî dimîne. Di Sermaweza 2004an de ji zindanê tê berdan.Piştî tê berdan li Rojnameya Azadiya Welat dest bi karê rojnamegeriyê dike. Li Azadiya Welat edîtoriya beşa cîhan û dîplomasiyê dike û karê wergerê dimeşîne. Şûn de derbasî Enstîtuya Kurdî ya Amedê dibe û di rêveberiya Enstîtuyê de wekî berpirsê kar û barê weşanê cih digire.Her wiha piştî ku Kovara W dewrê Enstîtuya Kurdî ya Amedê dibe; ji hejmara 13mîn şûn de edîtoriya weşanê ya kovarê jî digire ser xwe. Zal di heman demê de li Akademiya Dîrokê ya Rojhilata Navîn jî kar û barê redeksiyona xebatên kurdî dike. Di derveyê vana de mamostetiya taybet, wergera sîmultane, ya nivîskî, tîpguhezî û tîprêzî (ya erebî-latînî / latînî-erebî), grafik tasarim û rûpelsaziya (mîzanpaj) pirtûk, kovar û hwd. dike.